Susi, Perem Tanah (Bagian IV) - KO'SAPA

Jangan Lupa!

Ketika anda memakai cenderawasih, ingatlah bahwa yang anda pakai itu adalah bangkai dari Cenderawasih yang tersisa dan hampir punah. Semoga kita yang bangga dengan Cenderwasih, bukan orang buta huruf.

Susi, Perem Tanah (Bagian IV)

Ilustrasi perem tanah
Oleh : Marcell Rio

Setelah itu sa balik. Baru sampe di Hola begini, ada esemes dar dia. de bilang, su di mana? Sa tra balas. Trus sa jalan terus, sampe di ekspo, parkir motor dekat jembatan, baru sa lihat HP. Ada tiga panggilan tak terjawab. Trus ada pesan lagi. Sa liat begini, pesan dari ade nona dia.

"Kk, su di? (sms pertama)
"Kk su dimana. Ini z pu teman bilng tra jadi kerja tugas karna de ada pigi jenguk de pu sodara di Dian Harapan"

Sa sante-sante makan pinang. Dua pesan itu sa tra balas sama skali. Pinang yang sa makan su habis baru sa balas bilang sa masih di waena.

"sa ada isi bensin di pom bensis ekspo ni. bagimana?

Ini de tra sms lagi. Tapi langsung telp. Sa tra angkat de pu telp pertama. De telp lagi yang kedua. Sa angkat. Sa blom bicara, langsung de bilang di ujung telp, "Kam ni orang telp tuh angkat k?. "hahaha....." Sa balas deng ketawa saja.

Dari awal de panggil kk. Kedua waktu tong ke kampung Yoboi de panggil ko. Trus skarang de panggil kam. hahaha

Ini sudah. Kalo su kenal baik. Apalagi akrab. Ko mo tua ka, ko mu muda ka, pasti panggil ko. Ato kalo anana yang tau hargai orang, dong tetap bilang kk. Tapi pada umumnya dong bilang 'ko' dalam percakapan sehari-hari.

"Kalo su akrab. Su rasa nyaman. Pasti baku kontak setiap waktu. sampe kalo trada kabar, macam rasa setahun tra baku jumpa"

Sa bilang sa pulang ke Sentani. Jadi bagemana?

"Kk, sa mo ke Ramayana. Tapi bagemana. Kk tra papa ka kalo samasama?"

Sa jawab, "sa tra papa. Tapi sa rasa kurang enak. Kalo nanti pas jalan samasama baru nanti ketemu deng ko pu pacar. Untuk sa tra papa tapi. Untuk ade tuh yang...."

Habis sa kirim pesan ini, sa telp sebelum de balas.

Sa: Bgemana. mo kemana?
De: hmmm... sa su bilang baru. Ke Ramayana to?
Sa: Ko su baca pesan?
De: Belum. Sa pas mo baca baru kk telp ni.
Sa: oooh.... Itu kk bilang, trapapa untuk kk. tapi nanti kalo di ramayana tong ketemu ko pu pacar bagemana? (di sms bilang ade..... di telp bilang ko... hahaha.... sudah tuh!)
De: hmmm.... iyo sudah kalo begitu. Nanti sa naik angkot.
Sa: Ah... sudah trapapa. Sa datang. Ko tunggu depan jalan situ. (Ade nona dia tinggal di salah satu asrama di padang bulan)
De: trausa sudah. Nanti sa naik angkot.
Sa: ah trapapa tunggu depan jalan. Lalu tanpa kalimat penutup langsung telp putus...

Kadang-kadang, kalo cenderawasih dong ada pacar pun

 tra akan kastau terus terang karna de suka ko.

Tapi kalo ada cowok yang de benar-benar cinta, de akan tolak biar pun ko berjuang deng banyak cara untuk dekati dia. Kalo de ada pernah pacar tapi su putus, baru ko datang jadi de pu teman, lalu kebetulan saat itu kam baku dekat, di situ juga de mungkin tra akan jujur kalo de su putus.

Ini masa-masa kurisial. Karna di sisi lain sa tra tau de ada pacar ato tidak. Di sisi lain, masih curiga kalo ada pacar. Karena zaman skarang, belum kuliah, pas masih SMA ato SMP saja su tau kata Pacar dan pacaran.

Jadi yang sa kuatirkan adalah jang sampe ade nona de ada pacar. Trus tiba2 ketemu de pu pacar di ramayana.

sepuluh menit berlalu. Sa su di padang bulan. De su tunggu dengan cemas di jalan. Tapi kali ini de rapi. Su ganti baju dan mandi. Jadi keliatan segar. Kalo sa, su tau to, dari Yoboi, Yobe sampe ke padang bulan, su tra mandi, su tra ganti baju. Tapi sa tra pusing. Yang ada di sa pu pikiran skrang ini adalah orang yang ada depan sa dan mo naik motor samasama ke ramayana.

Tong su strar jalan.

Di motor, sepanjang jalan. Diam saja. Sampe pas di depan kantor perpustakaan daerah, sa tanya.
Sa : Ko mo beli apa di ramayana. Nanti sa tunggu ko di parkiran e.
De : Pokoknya adalah barang yang sa mo beli di sana. Ko mo tau buat apa. Ini kebutuhan bulanan perempuan.
Sa : Eh... maaf2 sa salah tanya.
De : Hahaha.. trapapa kk. Sa ada mo beli sa pu kebutuhan bulanan. Sa datang belanja di sini karna sa ada kartu member ramayana.  Kalo ada kartu member, bisa dapat diskon. Jadi nanti kk juga ikut. Trapapa.
Sa : Nanti sa tunggu di parkiran saja.
De : Ah kk. Trapapa. Jang lebay. Ikut saja.
Sa : Ah iyo sudah.

Tong su sampe di ramayana. Sa parkir motor di samping. Tong dua masuk lewat samping. Pas di dalama, de langsung ajak ke lantai paling dasar. Di sana de bilang kk suka minum apa, atau mo ambil buah begitu. Sa bilang sa ada uang. Nanti kk beli yang kk mau. Jadi ko beli saja yang ko mo beli. iyo sudah, de jawab singkat.

Sa ke tempat buah. Sa ambil apel satu kilo. Itu saja. trada lagi. Habis itu sa ke kasir, trus sa tanya Silver Queen. Dong bilang ada. Sa ambil SQ itu dulu. Sa ambil tiga. Trus sa tunggu de. De bawa de pu belanjaan satu kranjang.

Antri panjang juga. Di depan masih ada tiga orang. Tong orang ke empat. Lalu de tanya kk ambil apa. Sa bilang sa ambil ini saja (sambil kas tunjuk buah apel sekilo). SQ sa sembunyi mati dalam sa pu saku celana.

Setelh tong pu giliran, barang itu dikasi ke kasir. Lalu bayar dan tong langsung naik ke lantai satu. Habis itu ke parkiran.

Su jam 8 malam.

Sa ajak de langsung pulang. De pu belanjaan sa taru di depan. Sa bilang nanti tahan plastik dari belakang. De bilang, ah kk di belakang saja sudah. Sa bilang, ah sudah trapapa.

Tong star!

Jalan kluar dari ramayana. Sa tra arahkan motor kemana mana. Kam tau, ini su capek yang awas punya tapi su sama orang yg lagi dekat, apalagi cewe jadi anggap saja trada capek. Pulang balik sentani lima kali juga trapapa, hahhaha...

Langsung tong menuju ke padang bulan. Di lingkaran, sa ketemu sa pu teman yang batariak dari jauh, dekat jalan naik ke smansa abe.

Teman: Weei.... ko dari?
Sa : Habis dari ramayana. Ko bikin?
Teman : sa tunggu enggo nih. De ada ke penjahit dekat sini jadi. Ko mo ke mana?
Sa : Ini ada mo pulang ni.
Teman: Baru yang di belakang tuh sapa. Ipar k?
Sa: hahaha... ko sembarang saja. (Sa tutupi deng ketwa. nona yang di belakang de senyum2 tipis.
Teman: Ah... baru itu sapa jadi. Ko tipu lagi...
Sa : sudah... nanti juga ko tau. Iyo sudah, nanti sa tunggu kam dua di expo. Kontak e, nanti tong balik sama-sama.
Teman: Iyo sudah.... foi
Tong lanjut lagi. Sampe di padang bulan. Kas turun de pas di de pu jalan masuk asrama.
De turun, sa masih di motor.

Sa bilang, nanti kalo sa ada waktu ke sini nanti sa kasi kabar. De bilang, iyo sudah. Sa masuk dulu e....

Pas de su jalan beberapa langkah, sa panggil de datang....

Woi,,.... sini dulu.

De datang, lalu sa ambil plastik yang sa taru di sa pu saku ke dia. Ini sa lupa tadi. Ini sa mau kasi ko tapi lupa tadi.

Ini apa? de tanya.

Ko bawa saja. Nanti ko buka dari asrama. Sa capek jadi sa pulang dulu....

O iyo sudah. Da kk... hati2 di jalan.

Eh.... jang lupa besok makan siang di kantin poltekes e... (sa ingatkan)

De jawab... iyooo....  sambil berlalu dari sa pu pandangan dan sa juga pergi.

pas jam sepuluh sa sampe di rumah.

Lihat begini ada esemes panjang masuk.

"Trimakasih kk. kk baik sekali. su ajak jalan ke danau sentani di kampung Yoboi, kampung Yoi. (maksud dia Yobe). trus su antar sa kembali. kk Jangn lupa istrahat. Trimakasi lagi kk. Tuhan Yesus Berkati."
____
Sepanjang jalan, sa pu hape batre tewas. Jadi sampe di rumah sa tra buka hp. Cas kas tinggal, sa mandi, habis itu sa tonton di ruang tonton deng mama, bapa dan ade-ade dong... sampe sa tertidur di sofa yg ada di ruang tonton.

Bangun tengah malam.... tapi lupa lihat hape karna su mengantuk parah puanya jadi lanjut tidur lagi di lantai sampe pagi.

Bersambung...

Baca juga: 

Print Friendly and PDF

Tentang : Pace Ko' Sapa

Komunitas Sastra Papua, komunitas bagi mereka yang tertarik dengan sastra, adat dan budaya Papua. Semua catatan dalam Ko'Sapa diolah oleh redaksi Ko'Sapa untuk menjadi tulisan dalam situs ini. Silahkan kirim tulisan, atau informasi yang dingin di peroleh ke sastrapapua@gmail.com, trimakasih.

0 comments: