Trima kasi, Mama! - KO'SAPA

Trima kasi, Mama!

(Ko pangaru!)
Oleh: Izak Morin
Foto ilustrasi; Saliahun Suhuniap

Hari ini Mama ko pu hari suda!
Tong smua sayang ko, Mama.
Tapi, tong hanya bisa bilang: Trima kasi
karna tong tra bisa bayar Mama pu kasi.

Tong perna hidup snang di Mama pu poro.
Mama sayang dan jaga sampe tong kluar dari poro.
Tiga taun tong enak enak dapa susu dari Mama.
Makan dan tidor, mandi dan skola Mama jaga smua.

Tong sehat Mama senang.
Tong sakit Mama pusing.
Tong sukses Mama senyum.
Tong gagal Mama pendam.

Tong dekat Mama mara-mara sampe tra jadi.
Tong jau Mama rindu stenga mati.
Tong kenyang Mama tenang.
Tong lapar Mama sibuk.

Hari ini tong minta maaf, Mama.
karna tong slalu bikin ganas Mama.
Tong bataria, tipu tipu dan mara-mara.
Hari ini tong mo blajar sayang sama Mama.

Trima kasi, Mama!
Trima kasi, Mama!
Trima kasi, Mama!
Hanya ini yang tong bisa bilang untuk balas Mama pu sayang.
Waktu ada batas tapi Mama pu sayang tra perna ada batas.

22/12/17
Jow!
Wa wa wa!
Hormat dibri!

“SLAMAT HARI MAMA”
          (22/12/2017)

Baca juga:

http://www.sastrapapua.com/2017/12/kam-stop-tipu-tipu-suda.html
http://www.sastrapapua.com/2017/11/kejora-ko-tra-kosong.html
http://www.sastrapapua.com/2017/11/tong-tra-bisa-jalan-bale.html
http://www.sastrapapua.com/2017/10/kasih-abadi-seorang-mama.html
http://www.sastrapapua.com/2017/02/nkri-mati-harga-di-tana-papua.html
http://www.sastrapapua.com/2016/12/amber-komin.html

Print Friendly and PDF
Share on Google Plus

Tentang : Sastra Papua

Komunitas Sastra Papua, komunitas bagi mereka yang tertarik dengan sastra, adat dan budaya Papua. Semua catatan dalam Ko'Sapa diolah oleh redaksi Ko'Sapa untuk menjadi tulisan dalam situs ini. Silahkan kirim tulisan, atau informasi yang dingin di peroleh ke sastrapapua@gmail.com, trimakasih.
Post a Comment